చాలిక… మీ నిర్వాకం మేమే చూసుకుంటాం!
- తెలంగాణ కాంగ్రెస్లో ప్రక్షాళనకు ఏఐసీసీ సంకేతాలు
- పార్టీ, ప్రభుత్వంపై ఖర్గే తీవ్ర అసంతృప్తి
- ఢిల్లీ నుంచే సమన్వయానికి సిద్ధమైన అధిష్ఠానం
- “మీ రిపోర్టు అవసరం లేదు… మా దగ్గర గ్రౌండ్ రిపోర్ట్ ఉంది” అన్నట్టు ప్రచారం
- పార్టీ-ప్రభుత్వ సమన్వయ లోపంపై అధిష్ఠానం ఆగ్రహం
- దళిత ఎమ్మెల్యేల అసంతృప్తిపై ప్రత్యేక సమీక్ష
- వ్యక్తిగత ప్రచారంపై కూడా ఫిర్యాదులు వెళ్లినట్టు సమాచారం
తెలంగాణ కాంగ్రెస్లో నెలకొన్న అంతర్గత విభేదాలు ఇప్పుడు పార్టీ అత్యున్నత నాయకత్వం దృష్టిని పూర్తిగా ఆకర్షించాయి. అధికారంలోకి వచ్చి రెండున్నరేళ్లు దాటుతున్న తరుణంలో పార్టీ బలోపేతం కావాల్సిన సమయంలో విభేదాలు మరింత ముదురడం, మంత్రుల మధ్య సమన్వయం లోపించడం, ఎమ్మెల్యేల్లో అసంతృప్తి పెరగడం, జిల్లా స్థాయిలో నాయకత్వ పోటీలు ఎక్కువ కావడం, కార్యకర్తలు నిరుత్సాహానికి గురవడం వంటి పరిణామాలపై కాంగ్రెస్ అధిష్ఠానం తీవ్ర ఆందోళన వ్యక్తం చేస్తున్నట్లు పార్టీ వర్గాల్లో చర్చ జరుగుతోంది.
ఢిల్లీలోని ఇందిరాభవన్లో సోమవారం జరిగిన కీలక సమీక్షా సమావేశంలో ఏఐసీసీ అధ్యక్షుడు మల్లికార్జున ఖర్గే, కాంగ్రెస్ అగ్రనేత రాహుల్ గాంధీ సమక్షంలో తెలంగాణ వ్యవహారాలపై విస్తృతంగా చర్చ జరిగినట్లు తెలుస్తోంది. ఈ సమావేశం సాధారణ సమీక్ష కాదని, రాష్ట్ర కాంగ్రెస్ భవిష్యత్ దిశను నిర్ణయించే స్థాయిలో సాగిందనే అభిప్రాయం పార్టీ వర్గాల్లో వ్యక్తమవుతోంది.
“మీ రిపోర్టు అవసరం లేదు… మా దగ్గర పూర్తి సమాచారం ఉంది!”
సమావేశంలో ముఖ్యమంత్రి రేవంత్రెడ్డి తన వద్ద సిద్ధం చేసిన నివేదికను సమర్పించేందుకు ప్రయత్నించగా, అధిష్ఠానం దానిని స్వీకరించలేదని విశ్వసనీయ వర్గాలు పేర్కొంటున్నాయి. “తెలంగాణలో ఏం జరుగుతున్నదో మాకు పూర్తిగా తెలుసు. మా దగ్గర క్షేత్రస్థాయి నివేదిక ఉంది” అంటూ ఖర్గే వ్యాఖ్యానించినట్లు సమాచారం.
ఈ వ్యాఖ్య ఒక్కటే రాష్ట్ర కాంగ్రెస్పై అధిష్ఠానం ఎంత అసంతృప్తితో ఉందో చెప్పకనే చెబుతోంది. పార్టీ నిర్మాణం ఒక దారిలో, ప్రభుత్వం మరో దారిలో నడుస్తోందనే అభిప్రాయం సమావేశంలో బలంగా వ్యక్తమైనట్లు తెలుస్తోంది.
రెండు వారాల గ్రౌండ్ రిపోర్ట్… అధిష్ఠానం చేతిలో పూర్తి వివరాలు
ఈ సమీక్షకు ముందు ఏఐసీసీ తెలంగాణ వ్యవహారాల ఇన్చార్జి మీనాక్షి నటరాజన్ దాదాపు రెండు వారాల పాటు విస్తృతంగా క్షేత్రస్థాయిలో సమాచార సేకరణ చేపట్టినట్లు పార్టీ వర్గాలు చెబుతున్నాయి. ఎమ్మెల్యేలు, ఎంపీలు, ఎమ్మెల్సీలు, డీసీసీ అధ్యక్షులు, మంత్రులు, కీలక నాయకులతో విడివిడిగా సమావేశమై వారి అభిప్రాయాలను నమోదు చేసినట్లు తెలుస్తోంది.
జిల్లాల వారీగా పార్టీ పరిస్థితి, ప్రభుత్వంపై ప్రజాభిప్రాయం, కార్యకర్తల అసంతృప్తి, నియామకాలపై వివాదాలు, జిల్లా నాయకుల మధ్య విభేదాలు, స్థానిక సంస్థల రాజకీయాలు, క్యాడర్లో నిస్పృహ వంటి అంశాలన్నీ నివేదికలో పొందుపరిచినట్లు సమాచారం.
పార్టీని బలహీనపరుస్తున్న అంతర్గత విభేదాలు
తెలంగాణ కాంగ్రెస్లో ప్రస్తుతం వ్యక్తిగత వర్గాలే బలపడుతున్నాయనే అభిప్రాయం అధిష్ఠానం వద్ద ఏర్పడినట్లు తెలుస్తోంది. అధికారంలోకి రావడానికి కష్టపడ్డ కార్యకర్తలు ఇప్పుడు పక్కన పడుతున్నారని, ప్రభుత్వంలో పదవులు, అవకాశాలు కొద్దిమందికే పరిమితమయ్యాయని అనేక జిల్లాల నుంచి ఫిర్యాదులు వెళ్లినట్లు సమాచారం.
పార్టీ నిర్మాణం కంటే వ్యక్తిగత రాజకీయాలకే ప్రాధాన్యం పెరగడం వల్ల గ్రామ స్థాయి నుంచి జిల్లా స్థాయి వరకు కాంగ్రెస్ సంస్థాగత వ్యవస్థ బలహీనపడుతోందని పలువురు నాయకులు మీనాక్షి నటరాజన్ దృష్టికి తీసుకెళ్లినట్లు తెలుస్తోంది.
మంత్రుల మధ్య సమన్వయం లేదన్న అసంతృప్తి
సమావేశంలో మంత్రుల మధ్య సమన్వయం లేకపోవడంపై కూడా తీవ్ర చర్చ జరిగినట్లు తెలుస్తోంది. ఒక శాఖ నిర్ణయాల గురించి మరో శాఖకు అవగాహన లేకపోవడం, ప్రభుత్వ కార్యక్రమాల అమలులో ఏకాభిప్రాయం కనిపించకపోవడం, ఎమ్మెల్యేలతో మంత్రుల సంబంధాలు సరిగా లేకపోవడం వంటి అంశాలు ప్రస్తావనకు వచ్చినట్లు సమాచారం.
ప్రభుత్వం తీసుకునే నిర్ణయాలపై ముందుగా పార్టీ వేదికల్లో చర్చ జరగడం లేదనే అంశంపైనా అధిష్ఠానం అసంతృప్తి వ్యక్తం చేసినట్లు పార్టీ వర్గాలు పేర్కొంటున్నాయి.
దళిత ఎమ్మెల్యేల అసంతృప్తి…
ఢిల్లీ దృష్టిలో కీలక అంశం
ఇటీవల బహిరంగంగా వినిపించిన దళిత ఎమ్మెల్యేల అసంతృప్తి అంశం కూడా ఈ సమావేశంలో ప్రధాన చర్చగా నిలిచినట్లు తెలుస్తోంది. దళిత ప్రజాప్రతినిధులను పక్కనబెట్టే పరిస్థితులు ఏర్పడుతున్నాయనే ఫిర్యాదులపై అధిష్ఠానం ప్రత్యేకంగా చర్చించినట్లు సమాచారం.
“దళిత ఎమ్మెల్యేలను ఎగదోస్తున్న వారు ఎవరో మాకు తెలుసు” అనే స్థాయిలో అధిష్ఠానం హెచ్చరిక చేసినట్లు కాంగ్రెస్ వర్గాలు పేర్కొంటున్నాయి.
వ్యక్తిగత ప్రచారంపై కూడా ఫిర్యాదులు
హైదరాబాద్లో నిర్వహించిన కొవ్వొత్తుల ర్యాలీలో ముఖ్యమంత్రి రేవంత్రెడ్డి వ్యక్తిగత ప్రచారానికి అధిక ప్రాధాన్యం ఇచ్చారని కూడా అధిష్ఠానం దృష్టికి వెళ్లినట్లు సమాచారం. ర్యాలీ కోసం ఏర్పాటు చేసిన భారీ బ్యానర్లో సీఎం చిత్రానికే ప్రాధాన్యం ఇచ్చి, రాహుల్ గాంధీ, మల్లికార్జున ఖర్గే, ప్రియాంక గాంధీ వంటి జాతీయ నాయకుల చిత్రాలకు చోటు లేకపోవడం, కొన్ని రాజకీయ ప్రకటనలు పార్టీతో సంప్రదించకుండా చేయడం వంటి అంశాలపై ఫిర్యాదులు అందినట్లు తెలుస్తోంది.
క్యాడర్ను కాపాడుకోవాలన్న అధిష్ఠానం హెచ్చరిక
“ప్రభుత్వం మీది కావచ్చు… కానీ పార్టీ మొత్తం కాంగ్రెస్ది” అనే భావనతో అధిష్ఠానం రాష్ట్ర నాయకత్వానికి స్పష్టమైన సందేశం ఇచ్చినట్లు సమాచారం. కార్యకర్తలను నిర్లక్ష్యం చేస్తే పార్టీ బలహీనపడుతుందని, చివరికి ప్రభుత్వానికే నష్టం జరుగుతుందని హెచ్చరించినట్లు తెలుస్తోంది. బుధవారం కోఆర్డినేషన్ సమావేశం కీలకం
ఈ పరిణామాల నేపథ్యంలో పార్టీ-ప్రభుత్వ సమన్వయంపై ప్రత్యేక సమావేశం నిర్వహించాలని ఏఐసీసీ నిర్ణయించినట్లు సమాచారం. బుధవారం జరగనున్న ఈ సమావేశానికి ముఖ్యమంత్రి రేవంత్రెడ్డితో పాటు డిప్యూటీ సీఎం భట్టి విక్రమార్క, మంత్రులు ఉత్తమ్కుమార్రెడ్డి, దుద్దిళ్ల శ్రీధర్బాబు, దామోదర రాజనర్సింహ, పొంగులేటి శ్రీనివాస్రెడ్డి, సీతక్కలను హాజరుకావాలని ఆదేశించినట్లు తెలుస్తోంది. ఈ సమావేశంలో ప్రభుత్వ పనితీరు, పార్టీ వ్యవహారాలు, ఎమ్మెల్యేల అసంతృప్తి, జిల్లా స్థాయి విభేదాలు, దళిత ఎమ్మెల్యేల అంశం, పార్టీ-ప్రభుత్వ సమన్వయంపై కీలక నిర్ణయాలు వెలువడే అవకాశం ఉందని కాంగ్రెస్ వర్గాలు చెబుతున్నాయి.
విశ్లేషణ
తెలంగాణ కాంగ్రెస్ ప్రస్తుతం అధికారంలో ఉన్నప్పటికీ, సంస్థాగతంగా అనేక సవాళ్లను ఎదుర్కొంటున్నట్లు కనిపిస్తోంది. ఏ ప్రభుత్వానికైనా పార్టీ బలం, క్యాడర్ విశ్వాసం, నాయకత్వ సమన్వయం అత్యంత కీలకం. అవే బలహీనపడితే రాజకీయంగా ఇబ్బందులు ఎదురయ్యే అవకాశం ఉంటుంది. ఈ నేపథ్యంలో ఏఐసీసీ నేరుగా జోక్యం చేసుకోవడం సాధారణ పరిణామం కాదు. రాష్ట్ర నాయకత్వానికి ఇది ఒక హెచ్చరికగానే కాకుండా, సంస్థాగత పునర్వ్యవస్థీకరణకు సంకేతంగా కూడా రాజకీయ విశ్లేషకులు భావిస్తున్నారు. అయితే సమావేశంలో జరిగినట్లు ప్రచారం అవుతున్న వ్యాఖ్యలు, చర్చలపై కాంగ్రెస్ అధిష్ఠానం నుంచి అధికారిక ప్రకటన వెలువడలేదు. అందువల్ల వాటిని రాజకీయ వర్గాల్లో వినిపిస్తున్న సమాచారంగానే పరిగణించాలి.
సీనియర్ జర్నలిస్టు
7901503777