ఎంజీఎంలో వరుస ప్రమాదాలు.. రోగుల్లో భయాందోళన
- రెండు రోజుల్లో రెండు చోట్ల పైకప్పు పెచ్చులూడిపాటు
- ఆరోగ్యశ్రీ వార్డులో 8 మందికి గాయాలు
వరంగల్ సెప్టెంబర్ 22(ప్రజాక్షేత్రం):వరంగల్ ఎంజీఎం ఆసుపత్రిలో వరుసగా పైకప్పు పెచ్చులు ఊడిపడుతుండటంతో రోగులు, సిబ్బందిలో భయాందోళన నెలకొంది. ఈ ఘటనలు ఇప్పుడు రాజకీయ రగడకు దారితీశాయి. రెండు రోజుల క్రితం ఆరోగ్యశ్రీ వార్డులో స్లాబ్ పెచ్చులు ఊడిపడటంతో రోగులు, సిబ్బంది, సహాయకులు కలిపి 8 మంది గాయపడ్డారు. ఘటన మరువకముందే మంగళవారం ఆర్ఐసీయూ, ఫిజియోథెరపీ విభాగాల్లోనూ పైకప్పు పెచ్చులు ఊడిపడ్డాయి. ఆ సమయంలో ఎవరూ లేకపోవడంతో పెద్ద ప్రమాదం తప్పింది. గాయపడిన వారిని పరామర్శించేందుకు మాజీ ఎమ్మెల్యే దాస్యం వినయ్ భాస్కర్ బీఆర్ఎస్ శ్రేణులతో కలిసి ఎంజీఎంకు వెళ్లగా పోలీసులు అడ్డుకున్నారు. మార్చురీ వద్ద ఇరువర్గాల మధ్య తోపులాట జరిగింది. ఈ ఘటనలో దాస్యం వినయ్ భాస్కర్ అస్వస్థతకు గురైనట్లు బీఆర్ఎస్ నేతలు తెలిపారు. మరోవైపు సీపీఎం ఆధ్వర్యంలో ఎంజీఎం ఎదుట బైఠాయింపు, బీఆర్ఎస్ ఆధ్వర్యంలో పోతన రోడ్ జంక్షన్లో రాస్తారోకో నిర్వహించారు. ఆసుపత్రి సమస్యలు పరిష్కరించాలని, బాధ్యులపై చర్యలు తీసుకోవాలని డిమాండ్ చేశారు.