- నిందితుల్లో ముగ్గురు మైనర్లు ఉన్నారన్న పోలీసులు
- దసరా రోజు బాలికను కిడ్నాప్ చేసి అఘాయిత్యం
- పోక్సో చట్టం కింద కేసు నమోదు
- నిందితులకు డ్రగ్స్ టెస్టుల్లో నెగెటివ్
సిద్ధిపేట అక్టోబర్ 24(ప్రజాక్షేత్రం):తెలంగాణలోని సిద్దిపేట జిల్లాలో అత్యంత దారుణమైన ఘటన చోటుచేసుకుంది. 15 ఏళ్ల బాలికపై ఏడుగురు వ్యక్తులు సామూహిక అత్యాచారానికి పాల్పడ్డారు. ఈ ఘటనకు సంబంధించి ముగ్గురు మైనర్లు సహా నిందితులందరినీ పోలీసులు అరెస్ట్ చేశారు. వారిపై పోక్సో చట్టం కింద కేసు నమోదు చేసి దర్యాప్తు ప్రారంభించారు. పోలీసుల కథనం ప్రకారం.. దసరా పండుగ రోజున బాలిక తల్లిదండ్రులు పొలం పనులకు వెళ్లారు. ఇంట్లో ఒంటరిగా ఉన్న బాలికను గమనించిన నిందితులు, ఆమెను కిడ్నాప్ చేసి సమీపంలోని మరో గ్రామానికి తీసుకెళ్లారు. అక్కడ ఆమెపై సామూహిక అత్యాచారానికి ఒడిగట్టారు. మరుసటి రోజు ఉదయం బాధితురాలిని ఆమె గ్రామ సమీపంలో వదిలిపెట్టి వెళ్లిపోయారు. ఇంటికి చేరుకున్న బాలిక జరిగిన దారుణాన్ని తల్లిదండ్రులకు వివరించడంతో, వారు వెంటనే పోలీసులకు ఫిర్యాదు చేశారు. ఫిర్యాదు అందుకున్న వెంటనే పోలీసులు రంగంలోకి దిగారు. మద్దూరు ఎస్సై ఎండి.ఆసిఫ్ తెలిపిన వివరాల ప్రకారం, నిందితులు చెరియాల్ పట్టణం, ధూల్‌మిట్ట గ్రామానికి చెందినవారిగా గుర్తించారు. ఏడుగురినీ అదుపులోకి తీసుకుని కోర్టులో హాజరుపర్చగా, న్యాయస్థానం వారికి జ్యుడీషియల్ కస్టడీ విధించింది. నిందితులకు డ్రగ్స్ పరీక్షలు నిర్వహించగా, వారు మాదకద్రవ్యాలు సేవించిన ఆనవాళ్లు కనిపించలేదని పోలీసులు స్పష్టం చేశారు. చట్ట ప్రకారం బాధితురాలు, నిందితుల్లోని మైనర్ల వివరాలను గోప్యంగా ఉంచారు. ఈ ఘటనపై కేసు నమోదు చేసి లోతుగా దర్యాప్తు జరుపుతున్నారు.