- షెడ్లు వెలుస్తున్నాయ్‌..నిఘా ఏమైనట్లు?
- వరుస కథనాలైనా స్పందనేదీ?
- అనుమతులపై అధికారులే స్పష్టత ఇవ్వాలి
కుత్బుల్లాపూర్‌, అక్టోబర్‌ 26(ప్రజాక్షేత్రం):దూలపల్లిలో భారీ షెడ్ల నిర్మాణాలు.. వాటి అనుమతులపై సందేహాలు.. అయినా అధికారుల నుంచి స్పష్టత కరవు! పారిశ్రామిక వాడలోని దీపక్‌ స్టీల్‌ ఎంటర్‌ప్రైజెస్‌ వద్ద రెండు భారీ షెడ్ల నిర్మాణాల వ్యవహారం కొంపల్లి సర్కిల్‌ టౌన్‌ప్లానింగ్‌ విభాగం పర్యవేక్షణ తీరును ప్రశ్నార్థకం చేస్తోంది. నిర్మాణాలపై వరుస కథనాలు వెలువడుతున్నా.. క్షేత్రస్థాయిలో తనిఖీలు జరిగాయా? నిబంధనల ఉల్లంఘనలు గుర్తించారా? చర్యలు తీసుకున్నారా? అన్నది ఇంకా తేలాల్సి ఉంది.
కథనాలు వస్తున్నా..కదలిక ఏదీ?
పారిశ్రామిక ప్రాంతాల్లో నిర్మాణాలపై నిఘా ఉండాల్సిందే. అనుమతులు, నిర్మాణ ప్రణాళిక, సెట్‌బ్యాక్‌ల అమలును ఎప్పటికప్పుడు పరిశీలించాలి. దూలపల్లిలోని షెడ్ల వ్యవహారంపై ఇప్పటికే కథనాలు వచ్చిన నేపథ్యంలో అధికారులు క్షేత్రస్థాయిలో పరిశీలన జరిపారా? అన్నది కీలకంగా మారింది. వార్తలు ప్రచురితం కావడం మాత్రమే కాదు.. వాటిపై స్పందించి వాస్తవాలను వెల్లడించినప్పుడే ప్రజలకు స్పష్టత లభిస్తుంది.
అనుమతులున్నాయా..ఉల్లంఘనలున్నాయా?
భారీ షెడ్ల నిర్మాణాలకు సంబంధించి మంజూరైన అనుమతులు ఉన్నాయా? ఆమోదించిన ప్లాన్‌ ప్రకారమే పనులు జరుగుతున్నాయా? సెట్‌బ్యాక్‌లు, నిర్మాణ విస్తీర్ణం నిబంధనలకు అనుగుణంగా ఉన్నాయా? అన్న అంశాలపై అధికారులు రికార్డులను పరిశీలించాలి. నిర్మాణాలు కనిపిస్తున్నాయనే కారణంతో అక్రమమని నిర్ధారించలేం. అదే సమయంలో అనుమతులపై సందేహాలు వ్యక్తమైనప్పుడు తనిఖీలు నిర్వహించి వాస్తవాలను వెల్లడించాల్సిన బాధ్యత అధికారులపై ఉంది.
కాగితాలకే పరిమితమా పర్యవేక్షణ?
నిర్మాణాలు పూర్తయ్యాక చర్యలు తీసుకోవడం కంటే పనులు జరుగుతున్నప్పుడే ఉల్లంఘనలను గుర్తించడం ముఖ్యం. కొంపల్లి సర్కిల్‌ టౌన్‌ప్లానింగ్‌ విభాగం ఈ విషయంలో ఎలాంటి పర్యవేక్షణ చేపట్టింది? తనిఖీల్లో ఏమైనా గుర్తించారా? ఉల్లంఘనలు నిర్ధారణ అయితే ఎలాంటి చర్యలు తీసుకున్నారు? ఈ ప్రశ్నలకు అధికారిక సమాధానాలు రావాల్సి ఉంది.
డీసీ తనిఖీతోనైనా స్పష్టత వస్తుందా?
కొంపల్లి డిప్యూటీ కమిషనర్‌ ఈ వ్యవహారంపై ప్రత్యేక దృష్టి సారించి సమగ్ర తనిఖీ నిర్వహించాలని స్థానికులు కోరుతున్నారు. నిర్మాణ అనుమతులు, మంజూరైన ప్రణాళిక, సెట్‌బ్యాక్‌లు, విస్తీర్ణం, వినియోగంపై వాస్తవాలను వెల్లడించాలని విజ్ఞప్తి చేస్తున్నారు. నిబంధనల ఉల్లంఘనలు నిర్ధారణ అయితే చట్టప్రకారం చర్యలు తీసుకోవాలని డిమాండ్‌ చేస్తున్నారు.
నిర్మాణాలపై సందేహాలు..పర్యవేక్షణపై ప్రశ్నలు..సమాధానాల కోసం ఎదురుచూపులు!
దూలపల్లి షెడ్ల వ్యవహారంలో కొంపల్లి సర్కిల్‌ అధికారులు ఎప్పుడు స్పందిస్తారు? అనుమతులపై స్పష్టత ఎప్పుడు ఇస్తారు? ఉల్లంఘనలు ఉంటే చర్యలు తీసుకుంటారా? అన్నది వేచి చూడాలి.
