చిన్న వానకే ఫతేపూర్ ఫ్లైఓవర్ జలమయం
– చిన్నపాటి వర్షానికే ఫతేపూర్ ఫ్లైఓవర్ నీటిమునిగింది – ప్రజలకు ఇబ్బందులు
– శంకర్పల్లి మున్సిపల్ పరిధిలో సమస్యలు తీవ్రం
శంకర్పల్లి, మార్చి 17(ప్రజాక్షేత్రం):స్వల్ప వర్షానికే ఫతేపూర్ ఫ్లైఓవర్ పూర్తిగా నీటితో నిండిపోవడంతో స్థానిక ప్రజలు తీవ్ర ఇబ్బందులు ఎదుర్కొన్నారు. డ్రైనేజ్ వ్యవస్థ సరిగా లేకపోవడం వల్ల వర్షపు నీరు ఫ్లైఓవర్ పై నిల్వ ఉండి వాహనాల రాకపోకలకు ఆటంకం కలిగించింది. ప్రత్యేకంగా ద్విచక్ర వాహనదారులు ప్రమాదకర పరిస్థితులను ఎదుర్కొన్నారు. కొన్ని వాహనాలు నీటిలో ఆగిపోవడంతో ట్రాఫిక్కు అంతరాయం కలిగింది. స్థానికులు పలుమార్లు అధికారులకు ఫిర్యాదు చేసినప్పటికీ సమస్యకు శాశ్వత పరిష్కారం దొరకలేదని ఆవేదన వ్యక్తం చేస్తున్నారు.
శంకర్పల్లి మున్సిపల్ అధికారులు వెంటనే స్పందించి డ్రైనేజ్ వ్యవస్థను మెరుగుపరచాలని, నీరు నిల్వ కాకుండా చర్యలు తీసుకోవాలని ప్రజలు డిమాండ్ చేస్తున్నారు. ఇకపై వర్షాకాలాన్ని దృష్టిలో ఉంచుకొని ముందస్తు చర్యలు తీసుకోవాలని కోరుతున్నారు.
