పాట ఒక ప్రశ్న స్వరం ఒక పోరాటం
– గ్రామీణ గుండె నుంచి జనగుండెల దాకా పెరుముల సరస్వతి.
కొమురం బీం ఆసిఫాబాద్ జిల్లా జనవరి 25(ప్రజాక్షేత్రం):నేటి సమాజంలో మాటలు మూగబోయిన చోట పాట మాట్లాడుతుంది. భయాలు బంధించిన చోట స్వరం తిరుగుబాటు చేస్తుంది. అలాంటి స్వరానికి చిరునామాగా మారుతోంది పెరుముల సరస్వతి. నాగర్కర్నూల్ జిల్లా అమ్రాబాద్ మండలం తుర్కపల్లి గ్రామానికి చెందిన ఈ యువ గాయని తన గొంతుతో సమాజాన్ని ప్రశ్నిస్తూ, తన పాటలతో ప్రజలను చలింపజేస్తూ ముందుకు సాగుతోంది.
- వ్యవసాయ కుటుంబం నుంచి కళా ప్రయాణం.
వ్యవసాయమే జీవనాధారం అయిన మల్లయ్య బాలింగమ్మ దంపతుల కుమార్తె సరస్వతి. పొలం పనులు, కుటుంబ బాధ్యతలు, ఆర్థిక ఇబ్బందుల మధ్యే ఆమె బాల్యం గడిచింది. కానీ ఆ కష్టాలే ఆమెకు బలం అయ్యాయి. చిన్నతనం నుంచే పల్లె పాటలు, జానపద గీతాలు, మహిళా గీతాలపై ఆసక్తి పెరిగింది. ఆ ఆసక్తే నేడు ఒక స్పష్టమైన లక్ష్యంగా మారింది.
- ఆడపిల్లలపై అన్యాయాలకు ఎదురుగళం.
ఆడపిల్లలపై జరుగుతున్న దాడులు, అణచివేత, వివక్షలను చూసి మౌనంగా ఉండలేకపోయింది. అందుకే ఆమె పాటలు ప్రశ్నిస్తాయి…సమాజాన్ని నిలదీస్తాయి ఆడపిల్లల్లో ధైర్యం నింపుతాయి ఆమె పాడే ప్రతి పాట ఒక హెచ్చరిక ఒక చైతన్యం ఒక ఉద్యమం.
- విప్లవ గీతాల్లో ధైర్య స్వరం.
విప్లవ గీతాలు పాడటం అంటే సామాజిక బాధ్యత తీసుకోవడం. అన్యాయానికి ఎదురు నిలబడటం.ప్రజల పక్షాన నిలవడం. సరస్వతి ఆ బాధ్యతను భుజాన వేసుకుంది. ప్రజా సమస్యలపై, హక్కుల పోరాటాలపై ఆమె పాడే గీతాలు ప్రజల్లో చైతన్యం రేపుతున్నాయి.
- ఫోక్ పాటల్లో పల్లె జీవితం.
ఫోక్ పాటలంటే పల్లె జీవన చిత్రణ.రైతు కష్టం, మహిళా జీవితం, పండుగల ఆనందం అన్నీ ఆమె స్వరంలో స్పష్టంగా కనిపిస్తాయి.ఆమె పాటల్లో మట్టివాసన ఉంటుంది నిజం ఉంటుంది.
- మహిళల పాటలు మహిళల జీవితానికి అద్దం.
మహిళల పాటల్లో మహిళల బాధ, పోరాటం, ఆశలు ప్రతిఫలిస్తాయి. ఒక మహిళగా ఆమె అనుభవించిన కష్టాలే ఆమె పాటలకు ప్రాణం పోస్తాయి.ఈ పాటలు మహిళలకు అండగా నిలుస్తాయి.
- అమ్మ నాన్నలపై పాటలు హృదయాన్ని కదిలించే స్వరం.
అమ్మ, నాన్నలపై ఆమె పాడే పాటలు వినేవారి కన్నీళ్లు తుడుస్తాయి.తల్లిదండ్రుల త్యాగం, ప్రేమ, జీవిత పోరాటం అన్నీ ఒక్క పాటలో కనిపిస్తాయి.
- యూట్యూబ్ నుంచి ప్రజా వేదికల వరకు.
ఇప్పటివరకు యూట్యూబ్ ఛానళ్లలో 10కు పైగా పాటలు పాడి తన ప్రతిభను విస్తృత ప్రేక్షకులకు చేరవేసింది.అలాగే ఎమ్మెల్యే ఎన్నికల సమయంలో కళాబృందంతో కలిసి ప్రచార పాటలు పాడుతూ, ప్రజల మధ్య తిరిగి ప్రజా సమస్యలను స్వరంగా మలిచింది.
- ఆరు సంవత్సరాల కఠిన ప్రయాణం.
ఈ రంగంలోకి వచ్చి ఆరు సంవత్సరాలు పూర్తయ్యాయి. ఈ ప్రయాణంలో కష్టాలు ఎన్నో అవకాశాలు కొద్ది కానీ సంకల్పం మాత్రం గట్టి పడిపోయినా లేచింది నిరాశ వచ్చినా ముందుకు నడిచింది తన స్వరాన్ని వదల్లేదు
- ఈరోజు ఆమె ఎవరు?
ఈరోజు పెరుముల సరస్వతి కేవలం ఒక గాయని కాదు. ఆమె గ్రామీణ మహిళల స్వరం ఆడపిల్లల ధైర్యం ప్రజా సమస్యల పాట సంస్కృతి పరిరక్షకురాలు ఇలాంటి కళాకారులను గుర్తించి ప్రోత్సహించాల్సిన బాధ్యత సమాజానిదే. ప్రభుత్వాలు, కళా సంస్థలు, మీడియా ముందుకు రావాల్సిన అవసరం ఉంది. పెరుముల సరస్వతి స్వరం ఇంకా ఎన్నో వేదికలపై వినిపించాలి. ఇంకా ఎన్నో ఉద్యమాలకు ఊపిరి పోయాలి.ఇంకా ఎన్నో ఆడపిల్లలకు ఆశగా నిలవాలి. పాట ఆమె బలం…స్వరమే ఆమె ఆయుధం పోరాటమే ఆమె ప్రయాణ.
