సర్ నోటీసులు ఇళ్లకే ఇవ్వాలి!
- బీఎల్ఓల నిర్లక్ష్యంతో ఓటు హక్కుకు ముప్పు…
- ‘మా వద్ద ఉన్నాయి.. వచ్చి తీసుకెళ్లండి’ అంటూ వాయిస్ సందేశాలా?
- జిల్లా ఎన్నికల అధికారి తక్షణం జోక్యం చేసుకోవాలని ఓటర్ల విజ్ఞప్తి
వనపర్తి, ఆగస్టు 31(ప్రజాక్షేత్రం):ఓటర్ల జాబితా ప్రత్యేక సవరణ కార్యక్రమంలో భాగంగా జారీ చేస్తున్న నోటీసులను సంబంధిత ఓటర్లకు నేరుగా అందించాల్సిన బాధ్యత బూత్ స్థాయి అధికారుల (బీఎల్ఓ)పై ఉంది. అయితే కొందరు బీఎల్ఓలు నోటీసులను ఓటర్ల ఇళ్లకు తీసుకెళ్లి అందించకుండా, తమ వద్దే ఉంచుకుని ‘నోటీసులు మా వద్ద ఉన్నాయి.. వచ్చి తీసుకెళ్లండి’ అంటూ వాయిస్ సందేశాలు పంపుతున్నారన్న ఆరోపణలు వినిపిస్తున్నాయి. దీంతో అసలు నోటీసులు ఎవరికి అందాయి? ఎవరికి అందలేదు? అన్నది ప్రశ్నార్థకంగా మారింది.
ప్రతి ఓటరుకూ సమాచారం చేరాలి
ప్రత్యేక ఓటరు సవరణ కార్యక్రమంలో ఓటర్ల వివరాలకు సంబంధించి ఏవైనా అభ్యంతరాలు, మార్పులు, తొలగింపులు లేదా ఇతర అంశాలపై నోటీసులు జారీ అయితే అవి సంబంధిత ఓటరుకు చేరడం అత్యంత కీలకం. నోటీసు అందకపోతే తమ పేరు ఓటరు జాబితాలో ఉందా? లేదా? అనే విషయాన్ని తెలుసుకునే అవకాశం కూడా కొందరికి లేకుండా పోయే ప్రమాదం ఉంది. ముఖ్యంగా వృద్ధులు, నిరక్షరాస్యులు, బయట ప్రాంతాల్లో పనిచేసే కుటుంబ సభ్యులు, సాంకేతిక పరిజ్ఞానం లేని వారు వాయిస్ సందేశాలు లేదా ఇతర సమాచారాన్ని సకాలంలో గుర్తించే పరిస్థితి ఉండకపోవచ్చు. దీంతో నిర్ణీత గడువు ముగిసిన తర్వాత తమ ఓటు విషయంలో సమస్య తలెత్తితే ఎవరిని సంప్రదించాలన్న దానిపై అయోమయం నెలకొనే అవకాశం ఉంది.
వాయిస్ సందేశంతో బాధ్యత పూర్తయినట్టేనా?
‘నోటీసులు మా వద్ద ఉన్నాయి.. వచ్చి తీసుకెళ్లండి’ అని వాయిస్ సందేశం పంపడం ద్వారా నోటీసు అందజేత బాధ్యత పూర్తయినట్టుగా భావించవచ్చా? అని ఓటర్లు ప్రశ్నిస్తున్నారు. ప్రతి ఓటరుకూ వ్యక్తిగతంగా సమాచారం అందేలా అధికారులు చర్యలు తీసుకోవాలని కోరుతున్నారు. ప్రజాస్వామ్యంలో ఓటు హక్కు అత్యంత విలువైనది. ఒక్కసారి ఓటరు జాబితాలో పేరు లేకపోతే ఎన్నికల సమయంలో ఆందోళన చెందడం కంటే, సవరణ ప్రక్రియలోనే సమస్యను గుర్తించి పరిష్కరించుకునే అవకాశం కల్పించడం అధికార యంత్రాంగం బాధ్యత. అందుకే నోటీసుల పంపిణీ విషయంలో ఎలాంటి నిర్లక్ష్యానికి తావు ఉండకూడదని ఓటర్లు స్పష్టం చేస్తున్నారు.
గడువు ముగిసేలోపే చర్యలు తీసుకోవాలి
ప్రత్యేక సవరణ కార్యక్రమానికి నిర్ణీత గడువు ఉన్న నేపథ్యంలో అధికారులు వెంటనే స్పందించాల్సిన అవసరం ఉంది. నోటీసులు అందాల్సిన ప్రతి ఇంటినీ బీఎల్ఓలు సందర్శించి, సంబంధిత ఓటరుకు నోటీసు అందించారా? లేదా? అనే విషయాన్ని స్పష్టంగా నమోదు చేయాలని ప్రజలు కోరుతున్నారు. నోటీసులు అందించకుండా గడువు ముగిసిన తర్వాత ఓటరు పేరు తొలగినా, మార్పులు జరిగినా సంబంధిత ఓటరుకు తన అభ్యంతరాన్ని తెలియజేసే అవకాశం కోల్పోయే పరిస్థితి ఏర్పడవచ్చని వారు ఆందోళన వ్యక్తం చేస్తున్నారు.
జిల్లా ఎన్నికల అధికారి దృష్టి సారించాలి
ఈ వ్యవహారంపై జిల్లా ఎన్నికల అధికారి తక్షణం దృష్టి సారించి, అన్ని బీఎల్ఓలకు స్పష్టమైన ఆదేశాలు జారీ చేయాలని ఓటర్లు కోరుతున్నారు. నోటీసులను బి ఎల్ ఓ ల వద్ద ఉంచి ‘వచ్చి తీసుకెళ్లండి’ అని చెప్పడం కాకుండా, నిబంధనల ప్రకారం సంబంధిత ఓటర్లకు నేరుగా అందించేలా పర్యవేక్షణ చేపట్టాలని విజ్ఞప్తి చేస్తున్నారు. అలాగే ప్రతి బీఎల్ఓ పరిధిలో ఎన్ని నోటీసులు జారీ అయ్యాయి? ఎన్ని ఇళ్లకు అందించారు? ఇంకా ఎన్ని పెండింగ్లో ఉన్నాయి? అనే వివరాలను ఉన్నతాధికారులు రోజువారీగా సమీక్షించాలని కోరుతున్నారు. ‘ఓటు హక్కు విషయంలో ఒక్క ఓటరు కూడా నష్టపోకూడదు. అధికారులు ఇప్పటికైనా మేల్కొని, నోటీసుల పంపిణీ ప్రక్రియను పకడ్బందీగా పర్యవేక్షించాలి’ అని ఓటర్లు విజ్ఞప్తి చేస్తున్నారు. అధికారుల పర్యవేక్షణ అవసరం
ఓటరు సవరణ కార్యక్రమం ఉద్దేశం అర్హులైన ప్రతి ఒక్కరి పేరు జాబితాలో ఉండేలా చూడటమే. అందుకు భిన్నంగా నోటీసుల పంపిణీలో లోపాలు చోటుచేసుకుంటే అర్హులైన ఓటర్లు ఇబ్బందులు ఎదుర్కొనే అవకాశం ఉంటుంది. అందువల్ల జిల్లా స్థాయి అధికారులు క్షేత్రస్థాయిలో ఆకస్మిక తనిఖీలు నిర్వహించి, బీఎల్ఓలు నోటీసులను వాస్తవంగా ఓటర్లకు అందిస్తున్నారా? లేదా? అన్నది పరిశీలించాల్సిన అవసరం ఉంది. ఓటు హక్కు కాపాడటంలో నిర్లక్ష్యం వద్దు.. నోటీసు ప్రతి ఇంటికీ చేరేలా చర్యలు తీసుకోవాలన్నదే ఓటర్ల ప్రధాన డిమాండ్.
