తమిళనాడు ఎన్నికల్లో విజయ్ పార్టీ టీవీకే ప్రభంజనం
- 110 స్థానాల్లో ఆధిక్యంతో అధికార పీఠం దిశగా పయనం
- విజయ్కు శుభాకాంక్షలు తెలిపిన నాని, సాయి ధరమ్ తేజ్, శర్వానంద్
- సోషల్ మీడియా వేదికగా స్పందించిన టాలీవుడ్ ప్రముఖులు
- విజయ్ విజయంపై నాని ఆసక్తికరమైన పోస్ట్
నేషనల్ బ్యూరో మే 04(ప్రజాక్షేత్రం):తమిళ సినీ నటుడు, ‘తమిళగ వెట్రి కళగం’ (టీవీకే) పార్టీ అధినేత విజయ్ రాజకీయాల్లోనూ హీరోగా నిలుస్తున్నారు. 2026 తమిళనాడు అసెంబ్లీ ఎన్నికల్లో ఆయన పార్టీ ఊహించని రీతిలో ప్రభంజనం సృష్టిస్తోంది. మొత్తం 234 స్థానాలున్న తమిళనాట, టీవీకే పార్టీ ఏకంగా 110 నియోజకవర్గాల్లో ఆధిక్యంలో దూసుకుపోతోంది. దీంతో విజయ్ తదుపరి ముఖ్యమంత్రి కావడం దాదాపు ఖాయమైంది. ఈ చారిత్రక విజయంపై టాలీవుడ్ హీరోలు నాని, సాయి ధరమ్ తేజ్, శర్వానంద్ సహా పలువురు సోషల్ మీడియా వేదికగా అభినందనలు తెలిపారు.
మొదట సందేహించారు.. ఇప్పుడు కిరీటం పెట్టారు!
విజయ్ విజయంపై హీరో నాని ‘ఎక్స్’ (ట్విట్టర్) వేదికగా ఆసక్తికరంగా స్పందించారు. “అభినందనలు విజయ్ సర్. మొదట సందేహించారు. ఇప్పుడు కిరీటం పెట్టారు. ఇది మా ఇంట్లో జరిగింది. ఇప్పుడు పక్కింట్లోనూ జరుగుతోంది. అండర్డాగ్ గెలవడం ఎప్పుడూ సినిమా లాంటిదే (లేదా రాజకీయమా అనాలా?). తమిళనాడు ప్రజలు తమ నిర్ణయాన్ని స్పష్టం చేశారు. వారికి మంచి జరగాలని ఆశిస్తున్నాను” అని పోస్ట్ చేశారు.
విజిల్ పొడు.. విజయ్ అన్నా!
మెగా హీరో సాయి దుర్గా తేజ్ కూడా విజయ్కు శుభాకాంక్షలు తెలియజేశారు. “విజిల్ పొడు..! విజయ్ అన్నా, ఇది మీ ఉద్దేశాన్ని, అద్భుతమైన పనిని చాటిచెప్పే గొప్ప విజయం. ఒక నటుడు, చెప్పాలంటే ఒక దేవుడు… ప్రజాభిమానంతో అందరినీ తప్పు అని నిరూపిస్తే ఆ కిక్కే వేరు. ముఖ్యంగా దక్షిణాదిలో ఇది సాధారణమే. తమిళనాడు ప్రజలు భారీ సంఖ్యలో తీర్పు ఇచ్చారు. అందరూ ఎదురుచూస్తున్న మార్పును మీరు తీసుకురావాలని కోరుకుంటున్నాను. ఈ ఘన విజయానికి హృదయపూర్వక అభినందనలు” అంటూ తన ఆనందాన్ని పంచుకున్నారు.
నేను ముందే చెప్పాను..
మరో టాలీవుడ్ హీరో శర్వానంద్ సైతం విజయ్ను అభినందిస్తూ పోస్ట్ పెట్టారు. “నేను ముందే చెప్పాను. కొన్ని ప్రయాణాలు అంతకంటే గొప్ప వాటి కోసమే జరుగుతాయి. ఈ కీలకమైన ఘట్టంలో విజయ్ సర్కు నా అభినందనలు. సినిమా నుంచి నాయకత్వం వరకు, మీరు కోట్లాది మంది నమ్మకాన్ని గెలుచుకున్నారు. ముందున్న ప్రయాణానికి మీకు మరింత శక్తి చేకూరాలని ఆశిస్తున్నాను” అని తన పోస్టులో పేర్కొన్నారు. సినీ రంగం నుంచి రాజకీయాల్లోకి అడుగుపెట్టిన విజయ్, తొలి ప్రయత్నంలోనే అసాధారణ విజయంవైపు అడుగులు వేస్తుండటం పట్ల సర్వత్రా ప్రశంసలు వెల్లువెత్తుతున్నాయి.
